أرجو من الطلاب الأعزاء والمشاركين في هذا المنتدى الحفاظ على هذه القوانين:

1. الإلتزام بالآداب العامة وعدم التلفظ بأي ألفاظ بذيئة أو غير لائقة ومسيئة للآخرين وفي حال مخالفة ذلك سيتم إلغاء عضوية المشترك.
2. يمنع منعا باتا وضع الصور المخالفة للشريعة الإسلامية مثل الصور النسائية وغيرها من الصور المخالفة للشرع والآداب.
3. الآراء والمقالات المنشورة في هذا المنتدى بأسماء أصحابها أو أسماء مستعارة لا تمثل بالضرورة رأي المنتدى بل تمثل رأي كاتبها.
4. يمنع وضع العناوين البريدية الشخصية أو أرقام الهواتف الشخصية سواء في التواقيع أو المشاركات إلا بموافقة إدارة الموقع على ذلك.
يحق لإدارة المنتدى حذف أي موضوع يخالف الآداب العامة للمنتدى.
5. لكي تشاهد مواضيع وزوايا المنتدى عليك التسجيل والدخول كعضو للمنتدى.

التسجيل مجانا وسريع

قصة ثورة شعب

استعرض الموضوع السابق استعرض الموضوع التالي اذهب الى الأسفل

جديد قصة ثورة شعب

مُساهمة  Admin في الثلاثاء أكتوبر 18, 2011 6:53 pm

إسم الثوره
مافيش إسم رسمى لثورة مصر سنة 2011 لكن إتقال عليها إنها ثورة 25 يناير - الثوره المصريه - ثورة الغضب - ثورة اللوتس - الثوره البيضا- ثورة الشباب.

الأسباب
فيه حاجات كتيره إتسببت فى قيام الثوره و منها زيادة الفقر و قلة الحريات السياسيه و إستمرار حالة الطوارئ أكتر من تسعه و عشرين سنه و صعوبة وجود فرص الشغل و وحشية البوليس ، و قلة أماكن السكن ، و غلو العيشه و إرتفاع أسعار الأكل ، و إنتشار الفساد ، و عدم وجود انتخابات حره نضيفه و انعدام حرية التعبير. الثوره دى إبتدت بعد ثورة تونس و هما الإتنين من احتجاجات الشرق الاوسط و شمال افريقيا 2010-2011.

قانون الطوارئ
بعد ما إتقتل أنور السادات سنة 1981 مسك حكم مصر حسنى مبارك ، و نظام الحكم فى مصر هو نظام شبه رئاسى بيحكم البلد بقانون الطوارئ (القانون رقم 162 لسنة 1958 من سنة 1967 لحد النهارده ، باستثناء 18 شهر سنة 1980 و سنة 1981. و عدد المساجين السياسيين فى مصر اللى اعتقلوا تحت حكم قانون الطوارئ بيتقدر إنه ممكن يوصل تلاتين ألف (30000 ) مسجون . منظمات حقوق الإنسان قالت إن سنة 2010 كان فيه بين 5000 و 10000 شخص معتقلين لمدد طويله دون تهمه أو محاكمه

وحشية البوليس
إتسرب تلغراف من سفارة امريكا من سنة 2009 وصف وحشية البوليس ، بما فيه التعذيب ، اللى شايع و منتشر و جهود الحكومه علشان تمنع التعذيب مش نافعه و ناقصه من ناحية التنيفيذ و مش جد.
يوم 6 يونيه سنة 2010 مات شاب مصرى إسمه خالد محمد سعيد فى ظروف تفاصيلها عليها إختلاف فى سيدي جابر فى اسكندريه. السبب فى الإختلاف إن شهود كتير شهدو إن رجالة البوليس ضربو خالد لحد ما مات . و يوم 25 يونيه إتجمع اكتر من 5 الاف واحد فى مظاهرة فى اسكندريه و شارك فيها حركة شباب 6 ابريل و المسؤلين على صفحات الفيسبوك و الدكتور محمد البرادعى, و المستشار محمود الخضيرى و جورج اسحاق و ايمن نور و حمدين صباحى و مجموعة من قيادات الاخوان المسلمين و حزب الغد و الجميعه الوطنيه للتغير و متظاهرين بيمثلوا تقريبا كل التيرات السياسيه فى مصر و هتافات تطالب بسقوط الحكومه و محاكمة المسؤلين و سقوط الدولة البوليسية و هتفت ضد قانون الطوارئ و وزارة الداخليه و عمل محمد البرادعى مسيره مع عشرات عشان يعزى ام الضحيه و اعلن تضامنه معاهم.

رئاسة مبارك
حسنى مبارك مسك حكم مصر من أكتوبر سنة 1981 و ساب قانون الطوراىء اللى كان موجود من ايام السادات ممتد لاكتر من 29 سنه و قال إن الإرهاب اللى اتعرضت ليه مصر و الموجود فى المنطقه اللى حواليها كان ليه دور فى مد العمل بقانون الطوارىء.و منظمه ترانسبيرنسى الإمريكانيه إدت مصر 3.1 من 10 . ( 10 يعنى دوله مفيهاش فساد و 0 يعنى دوله كلها فساد ). الرقم رغم انه قريب و ساعات أعلى من دول مجاوره لمصر و لمجموعه كبيره من دول العالم التالت لكن بيوضح درجة الفساد فى مصر من وجهة نظر المنظمه. من جهه تانيه مجله امريكانيه اسمها " بيريد " Parade حطت مبارك فى المركز العشرين ما بين سبعين حاكم من ضمنهم " عبد الله " ملك السعوديه و " بوتين " رئيس روسيا اعتبرتهم المجله حكام ديكتاتوريين .
من جهه تانيه السياسه الخارجيه فى عصره كانت من عيوبها قلة القدره على التمييز بين العدو والصديق و نقص ملحوظ فى امكانيات التحليل السياسى السليم للأحداث ، و ده سبب مشاكل و ازمات كتيره لمصر مع دول العالم و القوى الكبرى. فوق كده شاف عهد حسنى مبارك دخول مصر عناصر اجنبيه من لاجئين و غيرهم بأعداد كبيره من مناطق متخلفه بتعانى من الصراعات الثيولوجيه و الاثنولوجيه ممكن يكون ليها اثر وحش على الثقافه المصريه الهوموجينيه و تطورها للأحسن و على السلام الاجتماعى فى المجتمع المصرى ، و كمان حشر مصر فى مشاكلالعرب و صراعاتهم ولعبها دور الأخ الطيب بيجيب لمصر و المصريين المشاكل و إتسبب فى دخول اختلافات خطيره فى الثقافه المصريه.

الفساد
الفساد السياسى فى وزارة الداخلية تحت إدارة الرئيس مبارك ارتفع بشكل كبير ، علشان زيادة القوة اللازمه علشان تمديد رئاسته. و و ده اتسبب فى سجن شخصيات سياسية و ناشطين شباب بدون محاكمة
الفساد الإفتصادى كمان تحت حكم الرئيس مبارك ارتفع بشكل كبير ، احمد عز إحتكر صناعة الصلب فى مصر و إتحكم فى أكتر من 60 ف الميه من حصة السوق علاء الدين الأعسر ، و هو كاتب و أستاذ أميركانى مصرى ، بيقول إن ثروة عيلة مبارك قيمتها من 50 ل 70 مليار دولار أمريكانى.
أحمد عز ، كان سكرتير عام الحزب الحاكم ، و بتتقدر ثروته بحوالى 18 مليار جنيه مصرى ؛ وزير الاسكان أحمد المغربى بتتقدر ثروته بأكتر من 11 مليار جنيه مصري ؛ و ثروة وزير السياحة زهير جرانة بتتقدر ثروته تكون 13 مليار جنيه مصرى ؛ وزير التجارة والصناعة ، رشيد محمد رشيد ، بتتقدر ثروته ب 12 مليار جنيه مصرى ؛ و حبيب العادلى وزير الداخلية بتتقدر ثروته ب 8 مليارات جنيه مصرى.

الاقتصاد
بحلول أواخر 2010 حوالى 40 ٪ من سكان مصر بيعيشو على اللى بيعادل حوالى دولارين امريكانى فى اليوم لكل واحد و بيعتمد جزء كبير من السكان على السلع المدعومة.

زيادة عدد السكان
مصر هيه تانى أكبر دوله فى أفريقيا فى عدد السكان بعد نيجيريا, و أكبر دوله فى منطقة الشرق الأوسط. و حسب تقدير سنة 2007 وصل عدد سكان مصر لحوالى 78,733,641 شخص (فيه تقديرات تانيه بتقول انهم وصلو 81,713,517 فى يوليه 2008)
سكان مصر كانو 30083419 سنة 1966 ، و معظم المصريين بيعيشو بالقرب من ضفاف نهر النيل ، في مساحة حوالي 40000 كيلومتر مربع (15000 ميل مربع) ، علشان دى بس الأراضى اللى ممكن تتزرع. زيادة عدد السكان ساعد فى زيادة الفقر ، و قلة التعليم ، و قلة النضافه ، و مشاكل الإسكان.

تفجير كنيسة إسكندرية
المقال الرئيسى: تفجير اسكندريه 2011
تفجير كنيسة القديسين ، عملية ارهابيه حصلت فى مدينة اسكندريه , مصر و سط الاحتفالات بليلة راس السنه. بعد حلول السنه الجديده بعشرين دقيقه حصل انفجار قدام كنيسة القديسين فى منطقة سيدى بشر. العملية الارهابية دى وقعت 25 قتيل المسيحيين الأقباط و حوالى 100 مصاب. بتعتبر اول عملية ارهابيه بالمنظر دا تحصل فى تاريخ مصر.قبل العملية بفتره تنظيم القاعده قام باستهداف كنيسة فىبغداد و هدد الكنايس فى مصر بنفس الحاجة لو , بحسب كلامهم , مافرجوش عن ستات اسلموا, و روجوا و شجعوا التعصب الدينى و قبل التفجير باسبوعين نزل على سايت سلفى متطرف دعوة لتفجير الكنايس فى مصر و عناوين اكتر من كنيسه منهم كنيسة القديسين و الطرق و الاساليب اللى ممكن يتعمل بيها المتفجرات.العملية عملت صدمة فى مصر و فى العالم كله. و إحتج كتير من المسيحيين فى الشوارع ، و انضم بعض المسلمين للاحتجاجات. و بعد الاشتباك بين الشرطة والمحتجين في الإسكندرية والقاهرة و هتفوا بشعارات ضد حكم مبارك في مصر.

قبل الثوره
علشان التحضير لاحتمال إن مبارك يتشال من الحكم، درست الجماعات المعارضه كتابات جين شارب على الثوره بدون عنف، بما فيها الشغل مع قادة أوتبور!، و الانتفاضه اللى عملها الطلبه الصرب سنة 2000. و كانت فيه نسخ من لستة شارب اللى بتوضح 198 نوع من أنواع الأسلحه اللى مش عنيفه، مترجمه لللغه العربى، و مش دايما عليها إسم شارب، بتتوزع فى ميدان التحرير وقت المظاهرات.

ثورة تونس
 المقال الرئيسى ثورة تونس 2010 - 2011
بعد نجاح ثورة تونس إنها تشيل رئيس تونس زين العابدين بن على من الحكم . قال كتير من المحللين، بما فيهم رومانو برودى، إن مصر هيا اللى عليها الدور تحصل فيها ثوره .

إنتحار بالحرق
فى الأيام الأولانيه قبل الاحتجاجات حصل ما يقلش عن ست حالات إنتحار عن طريق الحرق فى مصر ، منهم راجل إسمه عبد المنعم عبده جعفر ،صاحب مطعم عمره 49 سنه، اتقبض عليه و هو بيحاول يولع فى نفسه فى وسط مدينة القاهره قدام مجلس الشعب وهو بيهتف ضد مباحث أمن الدوله و فيه ست اشخاص معروف إنهم حاولوا الإنتحار عن طريق الحرق منهم: عبده عبد المنعم جعفر ، محمد فاروق حسن ، محمد عاشور سرور ، و السيد أحمد هاشم .
يوم بيوم
 المقال الرئيسى ثورة مصر سنة 2011 يوم بيوم

25 يناير يوم الغضب
المظاهرات دى إبتدت فى إماكن كتيره فى مدن زى القاهره ، اسكندريه ، السويس و الاسماعيليه فى وقت واحد و إتسمت يوم الغضب ،و كمان إتقال عليها إنها ثورة الشباب و زاد التوتر العام و إتظاهر ناس كمان قدام السفارات المصريه فى بلاد كتير. الحكومة وقفت خدمة الإنترنت فى مصر و فرضت حظر التجول ، و قالت إن ده علشان الحفاظ على النظام ومنع حدوث انتفاضة من الجماعات الإسلامية الأصولية.
منظمين حركة شباب 6 ابريل و كلنا خالد سعيد و الجمعيه الوطنيه للتغيير و حركة كفايه و حركة 25 يناير هما اللى إختارو يوم 25 يناير علشان يتزامن مع يوم عيد البوليس فى مصر. المشاركين فى المظاهرات كانو مجموعة متنوعة مختلف الظروف الاجتماعيه والاقتصاديه و الدينيه.
المظاهرات فى القاهره إبتدت قدام دار القضاء العالى فى وسط البلد و و حاول بوليس مكافحة الشغب اللى إسمهم الأمن المركزى تفريق المظاهرات و استعملو رصاص كاوتش و عصايات و خراطيم الميه ، و الغاز المسيل للدموع ، بس عدد المتظاهرين كان أكبر من المعتاد و قدرو يطلعو من حصار البوليس ليهم و راحو على ميدان التحرير.

26 يناير
يوم 26 يناير ، إتواصلت أعمال الشغب ، أعداد المحتجين كانت الآفات ، كان فيه زياده فى استخدام العنف من جانب المتظاهرين و البوليس . السويس شافت انتفاضة جذرية ،و إتحرقت مبانى حكومية ، بما فيها مركز للبوليس البوليس إتراجع فى نهاية المطاف من السويس ، و دخلها الجيش .

27 يناير
الاحتجاجات كانت مش كبيره يوم 27 يناير بسبب الاستعدادات للانتفاض على نطاق واسع يوم 28 يناير. و أعلنت جماعة الاخوان المسلمين المسلمين الدعم الكامل للاحتجاجات ، و رجع محمد البرادعى (زعيم معارضة بارز) من ڤيينا فى الوقت المناسب لاحتجاجات الجمعة. البرادعى قال إنه هايقبل إذا إتطلب منه إنه يتولى منصب رئيس مصر خلال الفترة الانتقالية إذا كان حسنى مبارك هايسيب مصر.

28 يناير جمعةالغضب
يوم 28 يناير انسحبت قوات البوليس و الامن المركزى من القاهرة و اسكندريه و السويس بعد ما زادت الاشتبكات بينهم و بين المتظاهرين و اعلن حسنى مبارك بصفته الحاكم العسكرى اعلان حظر تجوال فى المدن دى و نزل الجيش الشوارع.اعلنت وسايل الاعلام ان مبارك حيطلع يقول كلمة و بعدين اتلغى الخطاب و اتعلن قرار حظر التجوال فى مصر كلها. الحكومة المصرية نشرت الجيش فى القاهرة ، إسكندريه ، و السويس علشان مساعدة البوليس . بعد وقت قصير من صلاة الجمعة ، إتظاهر عشرات الآلاف من المصريين المحتجين ، وخلال ساعات ارتفع العدد لميات الآلاف. و إنضم لهم محمد البرادعى لكن اترش بمدفع ميه و كان فه أخبار إنه إتحجز فى بيته لكنه عمل مقابله مع بى بى سى يوم 29 يناير قال فيها إن مبارك لازم يسيب الرياسه
و قال الرئيس الامريكانى باراك اوباما إنه إتكلم مع مبارك و طلب منه "اتخاذ خطوات ملموسة تعزز حقوق الشعب المصرى".
و إتضرب ايمن نور و دخل مستشفا علشان يتعالج.

29 يناير
اعلن فتحى سرور رئيس مجلس الشعب انه هايطلع بعد فتره صغيره يقول بيان مهم و بعدين اتعلن ان حسنى مبارك هو اللى حيقول البيان و قال فيه انه حيشيل الحكومه و رفض الرئيس المصرى مطالب تقديم استقالته بعد ما أمر قوات و دبابات الجيش بالنزول للمدن في محاولة علشان تهدية انفجار احتجاجات الشوارع ضد حكمه
إتقتل تلاته على الأقل فى اشتباكات عنيفة قدام مبنى وزارة الداخلية وسط القاهرة، بعد ما حاول ألاف المتظاهرين اقتحام المبنى.
إتواصلت الاحتجاجات و المتظاهرين هتفو "يسقط مبارك" و بعضهم هتف "شعب وجيش واحد" ، و موقف الجيش فى مجرى الأحداث الحرجة لسه مش واضح.بليل بعد ما انسحبت قوات الامن المركزى من المدن حصلت هجمات منظمة و عمليات سلب و نهب قام بيها مجموعة من البلطجيه فى كل انحاء مصر تقريبا , فيه منهم اكتشف بعد كدا انهم افراد فى البوليس المصرى و مجموعة من المساجين خرجوا من السجون, لمجموعة من المحلات و بنوك و البيوت , و مفيش وجود للبوليس, و حصل اعتداء على المتحف المصرى و اتجمع المتظاهرين و اهالى المناطق اللى بيحصل فيها عمليات السرقة اتجمعوا , و كونوا لجان دفاع شعبية لحماية البيوت و المتاحف و الممتلكات الخاصة و العامة و انضم ليهم الجيش بعد كدا, و قدروا انهم يقبضوا على مجموعات من البلطجيه و الجيش استلمهم و احتجزهم.
و قال شهود عيان إن "بلطجية الحزب الوطنى" المرتبط مع النظام المصرى هما اللى نهبو المحلات و البيوت فى القاهره و كان فيه أخبار من إسكندريه إن العصابات اللى هاجمت المحلات و البيوت هناك كانت متشكله من رجالة البوليس فى هدوم مدنى علشان أوامرهم كانت خلق حالة من الفوضى علشان الناس تخاف و تحرس بيوتها بدل ما تطلع فى المظاهرات .
فى بنى سويف ، جنوب القاهرة ، مات 17 من المتظاهرين برصاص البوليس المصرى و هم بيحاول مهاجمة مركزين للبوليس فى المدينة.

30 يناير
إستمر تواجد المتظاهرين فى ميدان التحرير لكن بأعداد قليله ، و ده بسبب الهجمات المتنظمه و عمليات السلب و النهب اللى أجبرت الناس ترجع بيوتها علشان يحموها.
و قال البنك المركزى المصرى إن كل البنوك و البورصه المصريه ها تفضل مقفوله.
و منعت الحكومه قناة الجزيره إنها تشتغل فى مصر.
و قابل الرئيس مبارك،نايبه، اللوا عمر سليمان، والمشير حسين طنطاوى، وزير الدفاع، والفريق سامى عنان، رئيس هيئة أركان القوات المسلحة، فى مركز عمليات القوات المسلحة المصريه.
و قابل المشير حسين طنطاوى قوات الجيش عند التليفزيون و فى ميدان التحرير.

31 يناير
إستمرت المظاهرات فى ميدان التحرير و إسكندريه و السويس و المنصوره و دمنهور. و قابل الرئيس مبارك اعضاء الحكومه و ضمت التشكيلة 14 وزير جديد و15 وزير قديم قالو اليمين الدستورية قدام مبارك.و أكد الجيش إنه مش هايستعمل القوه ضد المتظاهرين.
و قال عمر سليمان، نايب الرئيس المصرى ان الرئيس حسنى مبارك كلفه يتكلم مع القوى السياسية عن عدد من القضايا و أولها الإصلاحات الدستورية والتشريعية.

1 فبراير
إستمرت المظاهرات و مظاهره إتسمت مسيرة المليون علشان هدفها كان إن يكون فيها مليون متظاهر.
أعلن مبارك إنه هايكمل ولايته لحد أكتوبر 2011 و مش هايترشح لولاية جديدة فى انتخابات رئاسة مصر فى سبتمبر فى كلمة وجهها للشعب المصرى وعد فيها بإصلاحات دستورية تتضمن تحديد فترات تولى الرياسه.

2 فبراير
خلال ليلة 01-02 فبراير ،اشتبك أنصار مبارك (البلطجية) مع المحتجين اللى ضده فى إسكندريه . و يوم 2 فبراير هجم انصار مبارك و هما راكبين إحصنه و جمال و معاهم كرابيج و رمو طوب و زلط و قنابل المولوتوف على المحتجين اللى فى ميدان التحرير. و هاجم انصار مبارك كتير من الصحفيين الأجانب.
و بعد يوم عنيف من الإشتباكات، المتظاهرين فضلو فى ميدان التحرير بس إتقتل تلاته على الأقل فى ميدان التحرير .
و قال بنيامين نتنياهو رئيس الوزرا الاسرائيلى إن عدم ترشح مبارك لرئاسة مصر يوم مأساوى فى تاريخ الشرق الأوسط كتير من المسؤليين فى دول كتير طلبو إن التغيير يحصل دلوقتى.

3 فبراير
انصار مبارك ضربو المعترضين برصاص حقيقى و إتقتل خمسه على الأقل فى ميدان التحرير و أكدت وكالة اسوشيتد برس الأمريكانيه في تحليل ليها، إن حسنى مبارك ضيع فرصته فى خروج مشرف من السلطة بعد تلاتين سنه من حكم مصر و إتنشرت أخبار إن فيه خلاف شديد بين الفريق أحمد شفيق رئيس الوزرا مع الرئيس مبارك وعمر سليمان نايب الرئيس بسبب اللى حصل يوم الأربع 2 فبراير و بعتان بلطجيه لقلب ميدان التحرير
و إتنشرت أخبار إن بعتان بلطجيه لقلب ميدان التحرير خططه جمال مبارك أمين لجنة السياسات فى الحزب الوطنى مع صفوت الشريف أمين عام الحزب الوطنى و ماجد الشربينى أمين التنظيم اللى حل محل أحمد عز، و إتنين من رجال الأعمال إبراهيم كامل و محمد أبو العينين، مع رجب هلال حميدة، وحسن عبد الرحمن رئيس جهاز مباحث أمن الدولة ممثل وزارة الداخلية.
و قال الرئيس حسنى مبارك فى مقابله مع ايه بى سى إنه مايهمهوش الناس بتقول عليه إيه و إنه زهق من الحكم وإنه عاوز يسيبه بس خايف يحصل فوضى فى مصر من بعده لو هو ساب الحكم.
و اتهمت شركة التليفون المحمول "ڤودافون" السلطات المصرية انهم استخدمو شبكة المحمول علشان يبعتو رسايل تكست بتأيد الحكومة.

و استقالت شهيره امين من منصب نايب رئيس قناة النيل ، و إنضمت للاحتجاجات علشان رؤساءها قالولها إنها لازم تتكلم عن المظاهرات الهزيلة المؤيدة لمبارك بس و لقت إنها مش قادره تكمل فى محاولة تضليل الشعب و غسل أدمغة ولاده.

4 فبراير
سما المعترضين اليوم جمعة الرحيل وإستمرت المظاهرات فى ميدان التحرير و إتكتب فى جورنال الجمهوريه فى مصر إ ن اللى بعتو مظاهرة علشان تأييد مبارك فى ميدان التحرير سيطر على عقولهم الغباء
و نشر جورنال الوفد قصيده كتبها فاروق جويده يطلب من مبارك إنه يرحل و خبر إن السفير محمد رفاعة الطهطاوى المتحدث بإسم الازهر قال إن النظام كتب نهايته بإيده
و نشر جورنال زى جارديان البريطانى مقال فيه إن ثروة الرئيس المصرى حسنى مبارك و عيلته ما بين 40 و 70 مليار دولار امريكانى

5 فبراير
اللوا حسن الروينى قائد المنطقه العسكريه المركزيه فى الجيش المصري راح ميدان التحرير و طلب من المتظاهرين إنهم يسيبو الميدان.
التلفزيون الحكومى المصرى أعلن إن أعضاء هيئة المكتب السياسى بتاع الحزب الوطنى الديمقراطى الحاكم إستقالو و حل محلهم أعضاء جداد. و إن حسام بدراوى رئيس لجنة التعليم والبحث العلمى فى أمانة السياسات و عضو الأمانة العامة للحزب حل محل صفوت الشريف الأمين العام للحزب و محل جمال مبارك، إبن رئيس مصر ، اللى كان أمين السياسات و أمين عام مساعد للحزب.
و كان فيه أخبار مش مؤكده إن حسنى مبارك كمان إستقال من زعامة الحزب الوطنى الديمقراطى.
و حصل انفجار فى سينا فى خط أنابيب الغاز لإسرائيل و الأردن و إتوقفت إمدادات الغاز المصرى لإسرائيل و الأردن و سوريا بعد انفجار خط الأنابيب
و حصل تفجير فى أكبر كنيسه فى رفح المصريه.

6 فبراير
إستمرت المظاهرات فى ميدان التحرير لكن إتسمع صوت ضرب نار فى القاهره

7 فبراير
إستمرت المظاهرات فى ميدان التحرير و إسكندريه.

8 فبراير
اكبر حشود من ساعة بداية الاحتجاجات، عشرات الآلاف من المتظاهرين حاصرو مجلس الشعب و مقر رياسة الوزرا القريبين من ميدان التحرير، و طلب چو بايدن نايب ريس امريكا توسيع الحوار.
المتظاهرين سمو اليوم ده يوم حب مصر و حصلت مظاهرات فى معظم محافظات مصر
عمر سليمان قال إن مصر مش جاهزه إنها تكون دوله ديمقراطيه

و طلب چو بايدن من عمر سليمان رفع حالة الطوارئ فوراً.

9 فبراير
المتظاهرين فضلو فى ميدان التحرير و حاصرو مجلس الشعب و قال المتحدث بإسم البيت الأبيض تصريحات عمر سليمان اللى تحدث قال فيها إن مصر مش جاهزه إنها تكون دوله ديمقراطيه تصريحات مش مفيده
و أخبار إن حصيلة ضحايا الاشتباكات فى محافظة الوادى الجديد، خلال يومين 8 و 9 فبراير ، وصلت 3 مقتولين و 100 مصاب.

10 فبراير
زاد عدد المتظاهرين فى ميدان التحرير و عمال كتير عملو اضرابات.
و قال حسام بدراوى أمين عام الحزب الحاكم فى مصر إنه يتوقع استجابة مبارك لطلبات الشعب قبل 11 فبراير. و قال حسام بدراوى لبى بى سى إنجليزى إنه طلب من مبارك يتنازل عن الحكم.

اصدر المجلس الاعلى للقوات المسلحة البيان نمره واحد قال فيه ان المجلس فى حالة إجتماع دايم علشان يناقش اجراءات و تدابير للحفاظ على الوطن و مكتسبات شعب مصر.
قابل حسنى مبارك، عمر سليمان، و احمد شفيق ، و اعلنت وسايل الاعلام ان مبارك ها يقول كلمه للشعب و إتنشرت أخبار إن مبارك ها يتنازل عن الحكم لكنه قال إنه طلب تعديل الدستور و إنه ها ينقل بعض صلاحياته لنايبه عمر سليمان.

و كان عدد المتظاهرين فى ميدان التحرير و الشوارع اللى حواليه حوالى تلاته مليون و رد فعلهم على خطابه كان شديد ضد مبارك.

11 فبراير
إستمر المتظاهرين فى ميدان التحرير و إتجمع متظاهرين قدام قصر الرياسه، قصر العروبة، فى مصر الجديدة. وزير المالية المصرى سمير رضوان قال لبى بى سى إن وقوع انقلاب عسكرى ها يكون له تأثير مش كويس على الشعب و الاقتصاد.
و إتنشرت أخبار إن مبارك راح شرم الشيخ
و قال حسام بدراوى أمين عام الحزب الحاكم فى مصر إنه هايستقيل من الحزب.

و قال نايب رئيس الجمهورية عمر سليمان إن الرئيس حسنى مبارك قرر إنه يسيب منصبه و سلم الحكم لمجلس عسكرى الى هو المجلس الأعلى للقوات المسلحة المصريه.

12 فبراير
أعلن المجلس الأعلى للقوات المسلحة المصرية حل برلمان مصر و تعليق الدستور. و أعلن إنه ها يمسك الحكم لمدة ست أشهر أو لحد الانتخابات.
avatar
Admin
مدير الموقع

المقالات : 169
تاريخ التسجيل : 04/10/2011
الموقع : ahmedabntolon.yoo7.com

http://ahmedabntolon.yoo7.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى